Huye, ku wa 28 Nyakanga 2025 - Mu gihe u Rwanda rwinjiye mu gihe cy’impeshyi kirangwa ahanini n’izuba ryinshi rituma bimwe mu byatsi byuma ku buryo bishobora kuba byatera inkongi z’umuriro mu mashyamba, kandi akenshi inkongi z’umuriro zikomoka ku bikorwa bya muntu, Ikigo cy’Igihugu Gishinzwe Amashyamba mu Rwanda (RFA) kirakangurira abaturarwanda bose kwitwararika birinda ibikorwa ibyo aribyo byose byateza inkongi.

Iki gihe cy’impeshyi, ni igihe byoroshye ko inkongi y’umuriro yakwihuta cyane mu mashyamba. Bimwe mu bikorwa buri Muturarwanda akwiye kwirinda twavugamo nko kunywera itabi hafi y’amashyamba, gutwika ibiyorero, ibikorwa byo gutwika amakara no guhakura mu buryo bw’akajagari n’ibindi. Hari kandi n’abana usanga botsa za nyirarunonko, abana batumwa kujya kurahura umuriro mu baturanyi, aha by’umwihariko ababyeyi barasabwa kubakurikirana kuko bishobora guteza inkongi z’umuriro zishobora kwibasira amashyamba.

Iyo inkongi yibasiye ishyamba, urusobe rw’ibinyabuzima byinshi bihasiga ubuzima, harimo nk’ inyamaswa, ibiti n’ibindi. Ibi bigira kandi ingaruka ku mwuka abantu bahumeka kubera ko amababi n’ibiti biba byahiye ndetse n’imyotsi ishobora kuba yatera indwara z’ubuhumekero. Kubw’iyo mpamvu buri wese akwiye kwitwararika muri iki gihe cy’impeshyi tukabungabunga amashyamba yacu kuko adufitiye akamaro harimo kuturinda ibiza, kuduha umwuka mwiza n'ibindi byinshi by’ingenzi ku buzima bwacu. 

Ikigo cy’Igihugu Gishinzwe Amashyamba mu Rwanda (RFA) kirasaba abaturage gutanga amakuru ku nzego za Leta zibegereye aho babonye umuntu ukora ibikorwa bishobora guteza inkongi mu mashyamba. 

Ku bindi bisobanuro mwatwandikira kuri info@rfa.rw cyangwa mugahamagara kuri nimero itishyurwa ya RFA: 9121.

###